1Cor 6 | PMA | STEP | Munak tai en kami mundemi keke tunali tai en demkatien mumoni tisa mini, romaltei keke hekuri heha en kot onen koakeil areingeingen Ahi. Mal imok keke hekuri heha ven meatin keil onen Ahi keke itali mal eni.

a 6:2 Dan 7:22; Luk 22:30; Rev 3:21; Rev 20:12-15

b 6:7 Mat 5:39; 1 Tes 5:15; 1 Pita 3:9

c 6:9Kal 5:19-21; Efes 5:5; Rev 22:15

d 6:11Taet 3:3-7

e 6:12 1 Kor 10:23

f 6:14Rom 8:11; 1 Kor 15:15-20; 2 Kor 4:14

g 6:15Rom 12:5; 1 Kor 12:27

h 6:16 Mat 19:5

i 6:17Sion 17:21-23; Rom 8:9-11; Kal 2:20

j 6:19 1 Kor 3:16; 2 Kor 6:16

k 6:20 1 Kor 7:23; 1 Pita 1:18-19

1 Corinthians 6

Hihiseien usil Sakien ten Kot en Kristin Keil

1 Munak tai en kami mundemi keke tunali tai en demkatien mumoni tisa mini, romaltei keke hekuri heha en kot onen koakeil areingeingen Ahi. Mal imok keke hekuri heha ven meatin keil onen Ahi keke itali mal eni. 2 Veni, musil rendemien enek, hetahos miheilea keke, en avong tai koa hemai, meatin keil onen Ahi ilei rahit usite onen meatin vasi keil ten out netan. ^a ?Ka munak hehi anatin, vensa varei mirkurtei meteisauen vavinvin keke mivatalimal en titi selien keil enges onami kosa? 3 Ka en angelo keil emun, ir rehelei rahit usite one. Sakini, titi rea keil koa havivi mok en out netan ekek, tahos rehetalimal eni. 4 ?Mukave, navong tounah tai hekistal en kami Kristin keil, mal keke mihekuri heha en kot onen koakeil arvitei Kristin koa amul hae en Sios? !Vuo, hermukteinek! 5 Navit usil sakien enek vasakin kami mivamemou eni. ?Anatin eli? ?En kami Kristin keil, meatin tovuol vakur meteisauen vavinvin keke vatalimal en titi selien keil onami? 6 Ka kami mimul mimusil sakien enek: Kristin tai kur Kristin sav va en kot, ka lumaen koakeil areingeingen Ahi aralimal en usite onealu. !Sakien koanek romaltei varei!

7 Rotahostei keke mimul mikukur kami miva en kot. Sakien enek mul rie lati keke kami mimot tuai en demkatien onami. Hetahos imok munak mihelokovein usite onami. Hetahos imok keke meatin koa mumoni tisa en kami, vuo koa venan tounah onami, mirkurtei vaha en kot. ^b 8 Ka kami, sakien onami teisav. Kami mimum tisa ka mivenan tounah ran meatin keil, avaseini avi tuami keil en demkatien.

9 Kami mimumoni suval mireingeingeni keke koakeil amum tisa irtotei en out koa Ahi vi Asuv Houlu ien. !Minaluvostei kami eris! Koakeil amum tisa en ave ral min meatin sav, vuo uva netan min nana keil, vuo akur ason meatin sav, vuo amumon mane en ave, vuo meahos koa matil ral min meahos sav; vati meatin keil enek irtotei en out koa Ahi vi Asuv Houlu ien. ^c 10 Anatin, koakeil avena, vuo avi metenan, vuo avi uti munmunien, vuo avit usil meatin sav, vuo avi tarhena; tovuol en keil kilea vato en out koa Ahi vi Asuv Houlu ien. 11 Ka mulamu, tei en kami mimumon sakien tisa keil enek. ^d Ka Ahi kas motein moulien onami ka ling lat kami ran meatin sav keil keke mivahi onen kati. Ven asa koa Iesu Kristo, Asuv orer, mumoni, Ahi mumon kami mimal en meten ral min Ninin Votut onen koa mul mum en moulien onami.

Hihiseien keke Avahati Lat Isen Ahi en Moulien Vasi One

12 Naraengoni keke tei en kami amul avit, “Ahi maen komai memumon tounah vasi.” Koanek anatin, ka tei en tounah keil enek artahostei ven kami. ^e Inau mun nakilea mahit, “Ahi maenau moumon tounah vasi,” ka nasakras mamaen etai tounah vahi houlu enau. 13 Tei mun en kami amul avit, “Ahi mumon anien keke rovalingi en vanger, ka mumon vanger keke reheling anien eni.” Koanek emun anatin, ka en avong tai hemai veah, anien ka vangen meatin hetovuol veni aver hau keil herkaniantei mun. Ka en vati rendemien koanek, tei en kami mimundemi keke Ahi mumon aver keke rovoum vatisa vatal min meatin sav keke valonge vatahos eni. Ka koanek rovitei anatin, veni Ahi rosantei aver minir keke rovoum vatisa vatal mini. Ahi san aver minir keke rovahati lati Asuv eni, ka kei vi Asuv ten aver. 14 Sakini rehoum hetahos en aver veni Ahi hesakin aver hemea ris ran matien hetal min keihoen onen, ^f suval koa kei sakin aven Asuv Iesu mea ris ran matien.

15 Kami mimumoni suval mireingeingeni keke avemi vi usi aven Iesu Kristo. ^g ?Mal keke miheapil en aven Iesu hetal min aven hoeaso koa kur mane en aven? !!Vuo, koanek romaltei!! 16 ?Mukave, mireingeingeni keke meatin koa maen aven kapil ral min aven hoeaso tai, avealu mai tas? Koanek anatin, veni Tus Votut viteni vit, ^h“Navong meahos heapil hetal min ahin onen, keilu luhetas.”(Sen 2:24) 17 Ka en usite sav, meatin koa kapil ral min Asuv Iesu, ninin onen ka Ninin onen Asuv lutas. ⁱ

18 Sakini, navong miles mesai keke mihoum hetisa en avemi hetal min meatin sav, mihelohosae rani. Veni navong meatin keil amumon tisaen sav keil, arpuruntei ave, ka navong amum tisa en ave ral min meatin sav, amul amum tisa vakat ave eris. 19 Kami mimumoni suval koa mireingeingeni keke avemi vi Eim Votut ^j ka Ninin Votut koa Ahi sani min kami mul ro ien. Tahos mikilea keke moulien onami rovitei mun onami, avi onen Ahi. 20 Veni kei vul lat kami ral min moulien onen Natnali koa vi tounah tai koa mariso vis mariso mok. ^k Sakini, mihehati lat isen Ahi en tounah vasi koa mimul mimumoni hetal min avemi.